بكرة لما تتجرجري.. سلوى خطاب تثير الجدل مع ياسمين عز
حلت الفنانة "سلوى خطاب" ضيفة في برنامج "كلام الناس"، أمس الجمعة، مع الإعلامية "ياسمين عز" المعروفة بتصريحاتها الجريئة، والذي ظهرت في الفترة الأخيرة تدافع عن الرجل بشكل كبير عبر برنامجها.
وقالت الفنانة سلوى خطاب ردا على سؤال ياسمين عن رأيها في الرجال: "كان عندي واحدة صاحبتي لها أراء عكس أرائك كده، وليها أراء متطرفة، وكنت بقولها هستنى لما تتجوزي وأشوفك وإنتي متجرجرة في الريسبشن من شعرك، وفعلا اتطلقت بعد ما جوزها جابها من شعرها".
وأستكملت: "الزواج شراكة، وكلنا بنتعب في حياتنا، الحياة محتاجة مجهود كبير، والطرفين لازم يبذلوا مجهود".
وعبرت الفنانة "سلوى خطاب" عن رأيها في الزواج: "دي تهيؤاتي وفكرتي عن الجواز، أنا منجحتش قوي أنا اتطلقت عادي يعني، أنا ضد المواعظ والنصائح لأن الجواز بالذات كل حالة قائمة بذاتها، لازم نعمل دراسة حالة 40 مليون جواز مثلا في مصر، منقدرش نعممها، أو نقول أصل لازم يحصل كذا".
سلوى خطاب تكشف سبب عدم الإنجاب
وردفت سلوى خطاب حديث عن عدم إنجابها "ده قدر من عند ربنا، بس ممكن ربنا عارف حالتي، أنا مفهمش يعني إيه أجيب أطفال ومتحملش مسئوليتهم، أجيب أطفال يبقى لازم أتفرغلهم وأربيهم وده هيتطلب من أن أنسى شغلي، وأنا كنت خلاص استهلكت في الجواز، من كتر ما أنا متفرغة للجواز، وبعدين أتجوز تاني وأخلف تاني، لأ، طب ما اعتزل أحسن، مكانش عجبني قوي، كنت حاسه كده، إن المجتمع ده لو خلفت فيه أنا هتعب، لإن فيه حاجات كتير مش عجباني ، وأنا مش فاهمة يعني إيه تربية حديثة، وأجيب عيال يقعدوا يقرفوني، يقولولي لأ، نعمل كذا، فالتربية الحديثة والجو ده مش بتاعي، مليش دعوه أنا يروحوا فين، الحمد لله كان زماني متجرجرة في الأقسام، العيال عاملين فيا محضر، الله يكون في عون الآباء".
وأوضحت الفنانة "سلوى خطاب"، سر حفاظها على رشاقتها، قالت: “كنت مع الفنانة العظيمة هند رستم، وفي مهرجان سألتها عن سر رشاقتها هي وجيلها، وردت قائلة : كنا بنلعب رياضة وبناخد تدريبات رقص، وكنا بنحرم نفسنا من الأكل، وأنا مكلتش رز إلا بعد ما اعتزلت، وتابعت ساعات بسيب نفسي للأكل، لكن هما 3 أو 4 كيلو، مش بسيب نفسي أكتر من كده، لأن لو الوزن زاد عن كده هيكون في صعوبة إن أحاول أرجع تاني”.
من هي سلوى خطاب؟
هي ممثلة مصرية، ولدت في القاهرة عام 1959 وتبلغ من عمرها 63 عام، وتخرجت من المعهد العالي للفنون والمسرحية، وشاركت في العديد من المسلسلات والأفلام منها "نيللي وشريهان، الفريسة والصياد، دماغ الشيطان"
